کتاب: رفیق لنگڑا

مصنف: کاوش صدیقی

تبصرہ: محمد جعفر خونپوریہ

اس بار کا موسم برسات میرے لیے کسی بہار کی طرح دلکش اور مہکتا ہوا تھا۔ جب مجھے کاوش صدیقی کی پانچ کتابوں کا حسین تحفہ ملا تھا، جن میں “جگنو”، “انو جیب کترا”، “اللہ جی”، “سرکار جی”، اور “رفیق لنگڑا” شامل تھیں۔

“رفیق لنگڑا” ایک عام انسان کی کہانی نہیں، بلکہ یہ ایک زہین، بہادر، محبت سے بھرپور اور ہر دلعزیز شخصیت کی داستان ہے جو ہر عمل میں زندگی کے نئے معنی تلاش کرتا ہے۔ جب میں نے اس کتاب کو ہاتھ میں لیا تو میری نیت تھی کہ اس پر تنقید کروں، لیکن جیسے ہی کہانی کی سطریں میری نگاہوں کے سامنے آئیں، میں اس کی گہرائیوں میں ڈوبتا چلا گیا۔ رفیق کا کردار ایک نام نہیں، بلکہ اس کی شخصیت کی گہرائیوں میں ایک سمندر چھپا ہوا ہے۔ اس کی ذہانت اور بہادری ایسی ہے کہ بڑے بڑے سورما اس کے سامنے بے بس نظر آتے ہیں۔ اس کی محبت سچی اور کھری ہے، اور اس کی بے باکیاں ایک جنگجو کی طرح ہیں جو ہر میدان میں بے خوفی سے اترتا ہے۔

“رفیق لنگڑا” سرمد سیریز کا وہ شاہکار ناول ہے جہاں پہلی بار میری ملاقات سرمد سے ہوئی۔ جیسے ہی میں نے اس ناول کے اوراق پلٹنا شروع کیے، میں سرمد کی دنیا میں داخل ہو چکا تھا—ایک ایسی دنیا جہاں حقیقت اور فسانے کے رنگ خوبصورتی سے ملتے ہیں۔ سرمد نے مجھے اپنی زندگی کے پیچیدہ اور دلکش راستوں پر چلنے کی دعوت دی اور اپنے جگری دوست رفیق لنگڑا سے بھی ملوایا۔ رفیق، جس کا نام لوگوں نے بگاڑ دیا تھا، دراصل ایک بے پناہ ذہین، نڈر، اور بے باک شخصیت کا حامل ہے۔ اس کی عقل اور دلیری اسے ہر معرکے میں کامیاب کرتی ہے، اور اس کی شخصیت میں وہ جاذبیت ہے جو لوگوں کے دلوں میں اپنی جگہ بنالیتی ہے۔

یہ ملاقات میرے لیے کسی گہرے اور پراسرار جنگل میں داخل ہونے جیسی تھی، جہاں ہر موڑ پر نیا راز منتظر تھا۔ میں رفیق کی دنیا میں گم ہو گیا کہ وقت کا احساس ہی نہ رہا، جیسے کسی مدھر نغمے کی دھن پر محو رقص ہو جاؤں۔ اور جب کہانی کا آخری صفحہ پلٹا، تو یہ احساس ہوا کہ ابھی تو رفیق لنگڑا سے پہلی بار ملاقات ہوئی تھی، اور اب رخصت کا وقت آ پہنچا ہے۔ یہ کہانی ایسی ہے جیسے کسی دلکش منظر کو پلک جھپکتے ہی نظروں سے اوجھل ہوتے دیکھنا، لیکن اس کی خوشبو اور تاثیر ہمیشہ کے لیے دل میں بس جانے والی ہوتی ہے۔

سرمد کے خالق کاوش صدیقی ہیں، جن کی تحریر دلوں کو چھو لینے والی ہوتی ہے۔ ان کی تخلیقات کو کتابی صورت میں فہیم عالم نے پیش کیا ہے، ۔ نثار احمد نے مہارت سے کمپوز کے فرائض ادا کیے ہیں، محمد فیصل اور اقراء یونس کی باریک بینی سے پروف کی گئی عبارتیں، اور قیصر شریف کے تیار کردہ دلکش سرورق نے اس ناول کو ایک شاہکار بنا دیا ہے۔

دسمبر 2023 میں شائع ہونے والا یہ ناول صرف 950 روپے میں دستیاب ہے، جو اس کی سادہ قیمت میں ایک قیمتی خزانہ سموئے ہوئے ہے۔۔ ہر صفحے پر جذبات کی گہرائی، ہر سطر میں لفظوں کا جادو، اور ہر منظر میں نیا رنگ، اس ناول کو بلاشبہ دلوں کا حکمران بنا دیتا ہے۔

اب “رفیق لنگڑا” کی کہانی کے پر پیچ اور اسرار بھری گلیوں میں قدم رکھتے ہیں، جہاں ہر کردار ایک نئی دنیا، ایک نئی کہانی کا دروازہ کھولتا ہے۔

یہ داستان ان معصوم بچوں کے گرد گھومتی ہے جو دنیا کی بے حسی اور ظالموں کے ہاتھوں اغوا ہو جاتے ہیں۔ ان بچوں کی آنکھوں میں چھپی ہوئی خوف اور بے بسی کی داستانیں دل کو دہلا دیتی ہیں۔ لیکن یہ داستان اتنی ہی سادہ نہیں جتنی نظر آتی ہے؛ اس میں چھپے راز آپ کو چونکا دیں گے۔

کہانی کا آغاز اس لمحے سے ہوتا ہے جب سرمد، برسوں بعد، اپنے گھر واپس آتا ہے۔ اس کی واپسی ایک ایسا لمحہ ہے جو ہر ایک کی آنکھوں میں خوشیوں کے آنسو لے آتا ہے۔ والدین کی چمکدار آنکھیں، بہنوں کی دیوانگی، اور بڑے بھائی کی خاموش قربانی—یہ سب مل کر ایک ایسا منظر تخلیق کرتے ہیں جس میں محبت اور انسیت کی خوشبو رچی بسی ہوتی ہے۔

مگر سرمد صرف ایک بچھڑا ہوا بچہ نہیں ہے، وہ ایک ایسا مسافر ہے جو اپنے تجربات کی پوٹلی کے ساتھ واپس لوٹا ہے۔ زندگی کے تلخ تجربات نے اسے انسانوں کو پرکھنے کا ہنر سکھا دیا ہے۔ یہی ہنر اسے شیخ صاحب جیسے مکار اور چالاک انسان کی حقیقت کو بھانپنے اور اسے انجام تک پہنچانے میں مدد دیتا ہے۔ دوسری طرف، وقار صاحب ہیں، جو اپنی ذہانت اور فطرت کی سچائی کے باوجود نیم پاگل سمجھے جاتے ہیں۔ آخر کیا وجہ تھی جس نے ایک باشعور انسان کو اس حد تک توڑ دیا؟

عمیر، وہ معصوم بچہ جو اپنے والدین کا فرمانبردار تھا، کس طرح ان سے بچھڑ گیا؟ اور بدو، جو بظاہر ایک ظالم انسان ہے، لیکن درحقیقت اپنے ہی دکھوں کی آگ میں جلا ہوا، ایک مظلوم کردار۔ قدرت نے اسے بھی سدھار دیا، اولاد کی جدائی نے اسے دوسروں کے دکھوں کا احساس دلا دیا۔

یہ کہانی نہ صرف انکشافات کی تہوں میں لپٹی ہوئی ہے، بلکہ ہر کردار اپنے اندر ایک الگ داستان رکھتا ہے۔ اس کہانی کا خلاصہ تب ہی ہو سکتا ہے جب آپ خود اس داستان کی گہرائیوں میں غوطہ زن ہوں۔

“رفیق لنگڑا” ایک ایسی کتاب ہے جو ہر گھر کی زینت بننی چاہیے، خاص طور پر ان گھروں میں جہاں بچے موجود ہیں۔ یہ ناول نہ صرف ایک دلچسپ کہانی پیش کرتا ہے، بلکہ ایک آئینہ بھی ہے جو ہمیں ان خطرات سے آگاہ کرتا ہے جو ہمارے اردگرد منڈلا رہے ہیں۔ اس لیے، اگر آپ کے گھر میں بچے ہیں، تو “رفیق لنگڑا” کی موجودگی لازمی ہے۔ یہ کتاب نہ صرف آپ کی لائبریری کا حصہ بنے گی بلکہ آپ کے دل و دماغ میں بھی دیرپا نقش چھوڑے گی۔